NATO: Veprimet e FSK-së, sinjale të gabuara 
KFOR-i ka marrë mbështetjen e diplomatëve të NATO-s në Bruksel lidhur me mosmarrëveshjen me FSK-në. Vendimi i komandantit të KFOR-it për pezullimin e raporteve me FSK-në ka qenë plotësisht i bazuar, pasi “veprime të tilla si të FSK-së dërgojnë sinjale të gabuara”, tha zëdhënësi i Aleancës, James Appathurai. Edhe diplomatë të Aleancës e kanë cilësuar të gabuar parakalimin e trupave të Forcës së Sigurisë së Kosovës me armë dhe me flamur të NATO-s në manifestimin “Epopeja e UÇK-së”. Të njëjtat burime pohojnë se FSK-ja nuk duhet të shihet si ushtri, pasi ajo është menduar si forcë civile e sigurisë, me përbërje shumetnike dhe e trajnuar nga vendet anëtare të NATO-s. S’ka kompromis për konferencën në Slloveni 
Nuk janë tejkaluar ende mosmarrëveshjet në lidhje me organizimin e konferencës së liderëve të Ballkanit Perëndimor në Bërdo afër Kranjit, ka deklaruar të hënën në Prishtinë, kryeministri slloven, Borut Pahor. Pas një takimi që zhvilloi me kryeministrin e Kosovës, Hashim Thaçi, kryeministri Pahor tha se do të dëshironte që në Kranj t’i shihte në një konferencë bashkë me liderët tjerë të Ballkanit edhe presidentin serb, Boris Tadic si dhe kryeministrin e Kosovës, Hashim Thaçi. Por, për shkak të kundërshtimeve serbe, Pahor tha se mbetet ende problematike përfaqësimi i shteteve, simboleve por edhe i nxjerrjes së deklaratës së përbashkët. Sidoqoftë ai është shprehur optimist se konferenca do të jetë e suksesshme dhe historike. Ndërkohë, kryeministri Hashim Thaçi nuk e ka sqaruar nëse ka paraqitur ndonjë pozicion të prerë të Kosovës lidhur me pjesëmarrjen e saj si shtet i barabartë në këtë konferencë, por i ka konfirmuar homologut të tij gatishmërinë e Kosovës që të jetë pjesë të gjitha nismave dhe konferencave rajonale Kosovë-Shqipëri, vlerësohet bashkëpunimi në fushën e arsimit 
Presidenti i Shqipërisë, Bamir Topi priti të hënën ministrin e Arsimit të Kosovës, Enver Hoxhaj dhe delegacionit që e shoqëron gjatë vizitës zyrtare në Tiranë. Në takim ishin të pranishëm edhe ministri i Shkencës dhe Arsimit i Shqipërisë, Myqerem Tafaj si dhe ambasadori i Kosovës, Gazmend Pulaj. Presidenti Topi me këtë rast vlerësoi pjekurinë e klasës politike dhe udhëheqjes kosovare në kapërcimin e sfidave të ndryshme, me të cilat është përballuar qysh nga dita e shpalljes së pavarësisë: ngritjen dhe konsolidimin e institucioneve të pavarura demokratike, forcimin e shtetit të së drejtës si dhe arritjet e deritanishme të diplomacisë së re kosovare përsa u përket njohjeve nga gjashtëdhjetë e pesë shtete të botës. Kreu i shtetit shqiptar vlerësoi edhe punën e bërë në drejtim të rritjes së bashkëpunimit mes institucioneve homologe dhe shkëmbimit të përvojës në fushën e arsimit, ku një ngjarje e rëndësishme ishte edhe nënshkrimi i Marrëveshjes së bashkëpunimit mes ministrit të Kosovës Hoxhaj dhe homologut të tij shqiptar, Tafaj. |
